VENTER FEES

Maarten en Petro se liefdesverhaal begin by die Neelsie Kwikspar in Stellenbosch. Petro het tydens haar studies deeltyds by die Universiteit gewerk en was 'n gereelde kliënt by die winkel. Maarten staan elke middagete getrou by die ingang van die winkel. Uit die duisende studente wat elke dag sy winkel besoek, vang Petro Maarten se oog.

In die maande wat daarop volg, besoek Petro steeds niksvermoedend die winkel terwyl Maarten haar op die winkel se sekuriteitskameras dophou. Een Vrydagmiddag in Februarie stap Petro en haar kollegas oudergewoonte die winkel binne om gou 'n toebroodjie vir middagete te koop. Maarten is eintlik al oppad huis toe, maar toe hy vir Petro gewaar besluit hy dis nou of nooit: vandag moet hy met hierdie meisie gesels!

Met 'n bemarkingspraatjie as invalshoek, stel hy hom aan die dames voor en versoek vriendelik of hulle tevrede is met die diens wat hulle ontvang. Gelukkig sien Petro se kollegas dat Maarten net oë het vir Petro en maak hulle stilletjies uit die voete. Uitendelik alleen, vertel Maarten vir Petro dat hy haar nou al 'n paar keer in die winkel gesien het en dat hy haar graag sal wil neem vir 'n koppie koffie. Sy stem in en hulle spreek af om mekaar by Basic Bistro in Kerkstraat te ontmoet.

Koffie word toe eerder 'n glasie wyn (om die senuwees te bedaar) en die twee kuier heerlik saam. 'n Tweede en derde afspraak volg, maar na 'n soen by 'n Spoegwolf konsert is die koeël deur die kerk.